Waswahili wana msemo wao usemao kuwa mbio za Sakafuni huishia ukingoni! Ndivyo ilivyo kwani baada ya 'kuingia mitini' May 08 kwa kisingizio cha kupinga mabadiliko ya muda wa mchezo, leo Mnyama anawaalika watani zake Yanga katika mchezo utakaopigwa uwanja wa Benjamin Mkapa
Leo mchezo unapigwa saa 11 jioni, hakutakuwa na kisingizio tena, kwani hakutarajiwi kuwa na mabadiliko ya muda
Ni mechi ya ubingwa kwa Simba. Kimahesabu Simba ni bingwa anayesubiri kuapishwa lakini ushindi leo utanogesha ubingwa huo
Historia itaandikwa kuwa Julai 03, 2021 Simba ilitangaza ubingwa wa ligi kuu kwa msimu wa nne mfululizo kwa kuifunga Yanga
Itabaki hivyo kwa miaka mingi, vizazi na vizazi vitasoma na kuhadithiwa historia hiyo
Ndio maana pamoja na kuwa na uhakika wa ubingwa, Simba inauhitaji sana mchezo kutengeneza rekodi juu ya rekodi
Mwenyekiti wa Bodi ya Wakurugenzi Bilionea Mohammed Dewji 'Mo', amewahakikishia Wanamsimbazi kuwa leo ni siku ya furaha kwao akiwataka wajitokeze kwa wingi uwanja wa Benjamin Mkapa ndani ya uzi wao mwekundu na mweupe kunogesha tukio la kihistoria linalokwenda kuandikwa
Sawa, wapo wanaosema mpira unadunda na wakati mwingine una matokeo ya kikatili, lakini jambo hili huwa ni gumu sana pale Simba inapokuwa inazihitaji alama tatu
Hapo kwa Mkapa hakuna aliyewahi kupona pale Mnyama anapoamua kuchukua alama tatu. Inakuwa sio ombi tena ni lazima, utazitoa
Wamekufa vigogo hapo msimu huu hakuna aliyetoka salama, hakuna anayetarajia jambo tofauti leo
Mashabiki wa Simba leo watafanya tukio maalum baada ya dakika 90 kukamilika, watawapigia makofi wachezaji wao kwa dakika tano baada ya ushindi dhidi ya Yanga
