Kocha Msaidizi wa Simba Selemani Matola amesema wako tayari kwa mchezo dhidi ya Yanga ambao utapigwa kesho Jumamosi katika uwanja wa Benjamin Mkapa
Akizungumza na Wanahabari katika Mkutano maalum kuelekea mchezo huo, Matola amesema wanafahamu mchezo utakuwa mgumu lakini wamefanya maandalizi sahihi ya kuwawezesha kuondoka na ushindi
Aidha Matola amesema kikosi kiko kamili, hawana mchezaji majeruhi, Jonas Mkude atakosekana kutokana na changamoto za kinidhamu wakati Ibrahim Ajibu ni mgonjwa
"Sisi tumejiandaa kikamilifu kuekea mchezo huu. Vijana wana ari na wako tayari kwa mchezo. Tunafahamu mchezo utakuwa mgumu lakini tumefanya maandalizi. Tunahitaji kushinda ili tuweze kuwa mabingwa"
"Katika mchezo wa kesho tutawakosa wachezaji wawili, Ibrahim Ajibu ambaye anasumbuliwa na Malaria na Jonas Mkude suala lake halijamalizika lakini wengine wote wapo tayari kwa ajili ya mchezo. Tunajua mchezo utakuwa mgumu lakini tumejipanga kushinda kwa kuwa tunataka kutangazwa mabingwa baada ya mechi"
Nahodha Msaidizi wa Simba Mohammed Hussein 'Zimbwe Jr' kwa upande wake amesema dhamira ya kila mchezaji ni kuona wanashinda mchezo wa Jumamosi ili kuwa mabingwa kwa msimu wa nne mfululizo
"Tumejiandaa vizuri, kila mmoja anajua umuhimu wa ushindi dhidi ya Yanga, naamini kwa maandalizi tuliyofanya, tutaondoka na ushindi"
