Mkuu wa kitengo cha habari na Mawasiliano klabu ya Simba,Haji Manara amewataka mashabiki kujitokeza kwa wingi siku ya Jumamosi kwenye mchezo wa ligi kuu dhidi ya Yanga utakaopigwa uwanja wa Benjamin Mkapa
Akizungumza na Wanahabari mapema leo kuelekea mchezo huo, Manara amesema utakuwa mchezo mzuri na wenye ushindani lakini wana matumaini makubwa ya kuibuka na ushindi
"Tuko tayari, dhamira yetu ni matokeo, kuwapa watu furaha. Wanasimba wanataka ushindi, bila shaka tutashinda na kuwa mabingwa"
"Simba ndio timu bora kuwahi kutokea Afrika Mashariki kupata matokeo mazuri.”
"Heshima ya mpinzani lazima iwepo kama ambavyo huwa tukicheza na timu zingine. Mechi itakuwa nzuri"
"Hii ni mechi kubwa, tunahitaji mashabiki waje kwa wingi. Nawaomba Wanasimba baada ya mchezo tukiwa tumeshinda tubaki uwanjani na tuwapigie makofi wachezaji wetu kwa dakika tano kwa kuwa mabingwa mara nne mfululizo," alisema Manara
Aidha Manara amesema wamepeleka ombi kwa TFF waweke kombe uwanjani ili kama watashinda mchezo huo wakabidhiwe ubingwa wao
"Niwaombe TFF kama itawapendeza watuletee kombe pale"
Mchezo huo utapigwa Jumamosi, Julai 03 kuanzia saa 11 jioni
