Mlinzi bora wa kulia Simba na timu ya Taifa, Shomari Kapombe amesema wachezaji wamedhamiria kushinda mchezo wa nusu fainali kombe la Shirikisho la Azam (ASFC) dhidi Azam Fc ambao utapigwa keshokutwa Jumamosi, uwanja wa Majimaji
Kapombe aliyewahi kuitumikia Azam Fc kwa mafanikio kabla ya kusajiliwa na Simba miaka minne iliyopita, amesema hawatawadharau Azam Fc kwani sio timu mbaya
"Tumejiandaa vizuri kwa ajili ya mchezo wa nusu fainali dhidi ya Azam. Tunafahamu mchezo huo hautakuwa mwepesi kwani Azam Fc ni timu nzuri. Lakini Simba ni timu kubwa na ina wachezaji wazuri zaidi"
"Tunajiandaa kikamilifu kuweza kushinda mchezo huo. Sisi malengo yetu ni kuingia fainali na kutetea ubingwa wa FA. Wachezaji tuko tayari na tunaomba Mungu atusaidie tuweze kufanikiwa," alisema Kapombe
Huu utakuwa mchezo wa pili kuzikutanisha Simba na Azam Fc msimu huu
Mchezo wa kwanza ulikuwa wa ligi kuu ambao ulipigwa uwanja wa Benjamin Mkapa na kumalizika kwa matokeo ya sare ya mabao 2-2
Simba imekuwa katika kiwango bora akishinda michezo tisa mfululizo katika mashindano yote
