Naamini jina lake litakuwa miongoni mwa wachezaji yatakayoteuliwa kuwania tuzo ya mchezaji bora wa Ligi Kuu na ndani ya klabu ya Simba msimu huu
Hapa tunamzungumzia kiungo mshambuliaji Luis Miquissone ambaye takwimu zake zinampa sababu ya kuwa mchezaji anayesakwa zaidi na klabu nyingi
Simba ina ofa kadhaa mezani kutoka kwa vigogo wa soka barani Afrika wanaotaka huduma ya mmakonde huyu
Katika michezo 36 aliyoshiriki na Simba kwenye mashindano yote msimu huu, Miquissone amehusika katika mabao 28
Amefunga jumla ya mabao 13 na kutoa pasi 15 za mabao
Yeye pamoja na Clatous Chama 'Mwamba wa Lusaka' ndio wachezaji waliohusika katika mabao mengi zaidi kwa maana ya kufunga na kutoa pasi za mabao kwa pamoja
Kwa hakika Miquissone ameitendea haki jezi yake ya Simba. Mwaka wake mmoja na nusu umekuwa wa mafanikio makubwa
