Kocha Mkuu wa Simba Didier Gomes amesema kikosi chake kimepania kutangaza ubingwa Julai 03 kwenye mchezo dhidi ya Yanga utakaopigwa uwanja wa Benjamin Mkapa
Baada ya ushindi wa bao 1-0 dhidi ya Polisi Tanzania hapo jana, Simba inahitaji kushinda mechi mbili tu ili kutangaza ubingwa kwa msimu wa nne mfululizo
Keshokutwa Jumanne mabingwa hao wa nchi watashuka uwanja wa Benjamin Mkapa kuikabili Mbeya City katika mchezo ambao kama watashinda, basi watahitaji alama nyingine tatu kutangaza ubingwa
Alama hizo wanazo Yanga! kwani mchezo wa ligi utakaofuata ni dhidi yao Julai 03
"Tumedhamiria kupata ushindi mchezo dhidi ya Yanga. Hii ni mechi muhimu ambayo inaweka rekodi kubwa kwetu kwa kuhakikisha ubingwa umerejea nyumbani tena, katika mchezo mkubwa na ninaamini hilo linawezekana," alisema Gomes
"Tunahitaji kushinda mechi mbili zijazo, baada ya ushindi dhidi ya Polisi Tanzania tunarudi Dar es Salaam kuishughulikia Mbeya City, baada ya hapo ndipo tutakutana na Yanga, itakuwa nzuri kushinda kombe mbele yao, nitakuwa mtu mwenye furaha kwa mafanikio hayo"
Aidha Kocha Msaidizi wa Simba Selemani Matola amesema haoni timu ya kuizuia Simba isiweze kushinda mechi zilizobaki ili kutangaza ubingwa mapema
"Kabla ya mchezo dhidi ya Polisi Tanzania, tulifahamu kuwa tunahitaji kushinda mechi zetu tatu zijazo ili kuwa mabingwa. Tunapambana kufanikisha hilo na kwa hakika hakuna kitakachotuzuia," alisema Matola
