Nahodha wa Simba John Bocco kesho Jumamosi anatarajiwa kukiongoza kikosi cha mabingwa hao wa nchi kwenye mchezo wa ligi kuu dhidi ya Polisi Tanzania ambao utapigwa uwanja wa CCM Kirumba jijini Mwanza
Bocco mwenye mabao 13, atakuwa na nafasi ya kumfikia na pengine kumzidi mabao Prince Dube wa Azam Fc anayeongoza mbio za kuwania kiatu cha dhahabu akiwa na mabao 14
Bocco yuko katika kiwango bora sana akitengeneza pacha hatari na Mcongomani Chris Mugalu aliyeweka kambani mabao 10
Nyota hao waliiangamiza Ruvu Shooting katika mchezo uliopita Simba ikishinda mabao 3-0 hapo hapo CCM Kirumba
Ni wazi Kocha Mkuu wa Simba Didier Gomes anaweza kuanza na washambuliaji hao kesho pamoja na kuwa Meddie Kagere aliyefunga mabao 11, atakuwa na wakati wake
Simba inahitaji kushinda mchezo huo ili kusogea karibu zaidi ya ubingwa kwani mpaka sasa wanahitaji alama tisa kutangaza ubingwa wa nne mfululizo
