Kocha Msaidizi wa Simba Selemani Matola amesema wamefanya maandalizi ya kutosha kuweza kupata ushindi dhidi ya Polisi Tanzania kwenye mchezo wa ligi kuu utakaopigwa kesho Jumamosi katika uwanja wa CCM Kirumba
Akizungumza kwenye Mkutano maalum wa mchezo, Matola amesema wachezaji wote wako tayari kwa ajili ya mchezo huo utakaopigwa Jumamosi saa kumi Alasiri
Aidha amesisitiza kuwa wanahitaji kuondoka na alama zote tatu ili kuharakisha mpango wa kushinda ubingwa wakifahamu wanahitaji kushinda michezo mitatu tu
"Kikosi kipo kamili wachezaji wote wapo kwenye hali nzuri, tunawaheshimu Polisi mara zote tukikutana wanatupa ushindani mkubwa lakini tumejipanga kuhakikisha tunashinda
"Tumewafunga katika mechi zote tatu za ligi tulizokutana nao, mbili za msimu uliopita na moja msimu huu lakini haimaanishi mechi ya kesho itakuwa rahisi kwetu, tutaingia kwa tahadhari na lengo letu ni kushinda ili kusogelea ubingwa wa ligi," alisema Matola
Naye nahodha msaidizi Mohamed Hussein, amesema kila mchezaji anafahamu umuhimu wa ushindi katika mchezo huo kuelekea ubingwa wa nne mfululizo
"Sisi kama wachezaji tupo tayari kupambana kwa ajili ya timu na lengo la kila mmoja ni kuhakikisha tunashinda ili kutetea ubingwa hivyo yeyote atakayepewa nafasi atafanya hivyo," alisema Tshabalala
