Bocco aita mashabiki uwanja wa Taifa

Nahodha wa timu ya Simba John Bocco amewataka mashabiki kujitokeza kwa wingi kwenye uwanja wa Taifa kesho Jumatano kuipa sapoti Simba itakapokwaana na Al Masry kwenye mchezo wa kombe la shirikisho, raundi ya kwanza.

Akizungumza kwenye Mkutano na Waandishi wa Habari leo kuelekea mchezo huo, Bocco amesema ari ya wachezaji iko juu na wako tayari kuikabili Al Masry.

"Tumejiandaa vizuri, wachezaji wote wako tayari kwa mchezo huo wa kesho. Tunawaambia Watanzania waje kwa wingi uwanja wa Taifa kutupa sapoti," amesema Bocco.

Naye kocha Mkuu wa Simba Pierre Lechantre amesema ana uzoefu wa kukutana na timu za Misri hivyo amewatoa hofu mashabiki wa Simba.

Lechantre amesema Simba itacheza mchezo wa Kimataifa kesho na watahakikisha wanaanza vyema kwa kuibuka na ushindi nyumbani.

Afisa habari wa Simba Haji Manara amewataka mashabiki waendelee kununua tiketi kwa wingi wakati huu ili wasipate tabu hapo kesho.

Aidha, Manara amewataka wapenzi, wanachama na mashabiki wa Simba kujitokeza kwa wingi uwanjani kesho..

Manara ameeleza kuwa anatambua mchango wa mashabiki hivyo vema wakaja kwa wingi uwanjani ili kuipa hamasa timu na wachezaji kwa ujumla.

Mchezo huo unatarajiwa kuanza saa 12:00 jioni ambapo viingilio vitakuwa; VIP A 20,000/- VIP B na C 15,000/- na mzunguuko 5,000/-