Kocha Mkuu wa Simba Didier Gomes kwa sasa hesabu zake ni kuelekea msimu ujao baada ya kujiweka katika nafasi nzuri ya kutwaa ubingwa wa ligi kuu pamoja na kutetea kombe la FA
Simba imesalia na michezo saba kumaliza msimu wa VPL, lakini Wekundu hao wa Msimbazi wanahitaji kushinda michezo mitatu tu kulirejesha taji kabatini pale Msimbazi kwa msimu wa nne mfululizo
Kwenye kombe la FA mabingwa hao watetezi wameingia nusu fainali mchezo wa hatua hiyo ukiwa dhidi ya Azam Fc
Gomes amesema kwa mtizamo wake ni kuwa msimu huu umemalizika na sasa wameanza maandalizi kuelekea msimu ujao
"Tumebakiwa na michezo saba kabla ya kumaliza msimu, kwa ubora tuliokuwa nao hivi sasa ukilinganisha na ule wa wapinzani wetu naona kama ligi imekwisha na Simba ndio bingwa hata kwenye Kombe la FA bado sijaona timu ambayo itatuzuia kutetea taji hilo," alisema Gomes ambaye hivi karibuni alisafiri kwenda Ufaransa kwa ajili ya mapumziko
Kocha huyo mwenye uzoefu wa soka la Afrika, amesema sasa yupo katika mazungumzo muhimu na uongozi wake kuhusu kukiboresha kikosi na aina ya wachezaji ambao wamepanga kuwaongeza ambao uwezo wao utakuwa tofauti kutokana na malengo waliyokuwa nayo
Alisema mafanikio waliyoyapa msimu huu yanahitaji juhudi kuyaendeleza msimu ujao na hiyo inahitaji umakini mkubwa, hasa katika kipengele cha usajili, ambacho ndio chenye kuonesha ubora wa timu na upatikanaji wa matokeo mazuri.
