Ukikiangalia kikosi cha Simba ni wazi hutarajii kuona mabadiliko makubwa yakifanyika katika dirisha la usajili linalotarajiwa kufunguliwa hivi karibuni
Hesabu za Simba kujiimarisha ni kwa ajili ya Kimataifa zaidi kwani kwa ligi ya ndani Simba imejipambanua kuwa iko mbali sana kulinganisha na timu nyingine
Ndio manaa hata Kocha Mkuu wa mabingwa hao wa nchi Didier Gomes amedokeza kuwa hatarajii kufanya usajili mkubwa
Gomes amesema anahitaji kuongeza wachezaji wawili tu wa kigeni, mlinzi wa kati na mshambuliaji kwani ndio maeneo aliyobaini kuwa na changamoto
Aidha kwa wachezaji wa ndani, Gomes amesema Simba ndio timu yenye wachezaji bora zaidi wa ndani licha ya kuwa baadhi yao hawapati nafasi ya kucheza mara kwa mara kutokana na ushindani uliopo
Hivyo hafikirii kusajili labda kama kuna mchezaji ataondoka mwenyewe jambo ambalo hatarajii kuona likitokea kutokana na ukweli kuwa Simba ndio klabu inayowapa wachezaji wake huduma bora zaidi kulinganisha na timu nyingine zinazoshiriki ligi kuu
"Hatuna mapungufu makubwa sana mpango wangu ni kufanya usajili makini ambao utaziba makosa yaliyotugharimu msimu huu kwenye michuano ya kimataifa ndio maana nataka kuongeza nyota wawili wenye uzoefu wa kutosha na mashindano hayo, "alisema Gomes.
