Ruvu Shooting wametepeta mbele ya Simba leo baada ya kufumuliwa mabao 3-0 katika mchezo uliopigwa uwanja wa CCM Kirumba
Hii ndio Simba ambayo ikiwa na jambo lake hakuna wa kuizuia!
Ushindi wa bao 1-0 waliopata katika mchezo wa duru ya kwanza, uliwapa kiburi Ruvu shooting Msemaji wao Masau Bwire akitamba kila kona
Lakini leo baada ya dakika 90 kukamilika, Bwire ilimlazimu kutafuta kichaka cha kujificha kwani maji ya shingo
Mabingwa wa nchi Simba walitawala mchezo huo tangu dakika ya kwanza, wakaandika bao la kuongoza mapema tu kwenye dakika ya 17 kupitia kwa nahodha John Bocco
Ilikuwa siku nzuri kwa Bocco kwani muda mfupi kuelekea mchezo huo alitangazwa kuwa mchezaji bora wa Simba mwezi Mei
Chris Mugalu ameendeleza pale alipoishia mchezo uliopita akiifungia Simba bao la pili kupitia pasi murua ya Bernard Morrison 'Mzee wa kuwakera'
Morrison aliisaidia Simba kupata mkwaju wa penati kwenye dakika za majeruhi baada ya kufanyiwa madhambi na mlinda lango wa Ruvu Shooting
Bocco akitumia nafasi hiyo kuifungia Simba bao la tatu likiwa ni bao lake la pili siku ya leo
Ruvu Shooting walimaliza tisa baada ya wachezaji wake wawili kutolewa nje kwa kadi nyekundu
Juma Nyosso alimpiga ngumi Shomari Kapombe wakati mlinda lango alitolewa baada ya kumfanyia madhambi Morrison
Simba imeendelea kujichimbia kileleni mwa msimamo wa ligi baada ya kufikisha alama 67
Alama tisa zimesalia kabla ya Simba kushangilia ubingwa wa msimu wa nne mfululizo
