Mabingwa wa nchi Simba jioni ya leo watashuka uwanja wa CCM Kirumba kuwakabili maafande wa Ruvu Shooting katika mchezo wa ligi kuu ya Vodacom
Huu ni mchezo wa duru ya pili baina ya timu hizo msimu huu huku Ruvu Shooting wakiwa na kumbukumbu ya kushinda bao 1-0 katika mchezo wa duru ya kwanza
Hata hivyo leo wanakutana na Simba nyingine kabisa, Simba ya Didier Gomes ambayo haijapoteza mchezo wowote kwenye ligi tangu kocha huyo alipotua nchini mwanzoni mwa mwezi Januari 2021
Hesabu za 'Mnyama' ni kushangilia ubingwa mapema, wanahitaji kushinda mechi nne tu
Ushindi dhidi ya Ruvu leo utawafanya waendelee kusogea karibu ya ubingwa kwa mara ya nne mfululizo
Baada ya ushindi wa mabao 3-1 dhidi ya Namungo Fc katika mchezo uliopita, Simba imepania kuendeleza wimbi la ushindi pale CCM Kirumba
Kocha Msaidizi Selemani Matola amesema baadhi ya wachezaji watakosekana kutokana na sababu mbalimbali
Joash Onyango ni majeruhi wakati Clatous Chama yuko Zambia anakohudhuria msiba wa mkewe aliyefikwa na umauti mwishoni mwa wiki iliyopita
Simba ilitua jijini Mwanza ikiwa na kikosi cha wachezaji 21 ambao leo wana jukumu la kuwapa furaha Wanamsimbazi
