Lechantre akomaa na viungo wa Simba

Kocha Mkuu wa Simba Pierre Lechantre amechukizwa na makosa ya kizembe yaliyofanywa na wachezaji wa Simba kwenye mchezo wa ligi kuu ya Vodacom dhidi ya Stand United.

Mchezo huo uliomalizika kwa sare ya mabao 3-3 uliishuhudia Simba ikiruhusu mabao matatu kutinga katika nyavu zake kwa mara ya kwanza msimu huu.

Hilo limempelekea Lechantre kuandaa program maalum kuhakikisha makosa hayo hayajirudii kwenye mchezo ujao wa kombe la shirikisho dhidi ya Al Masry.

Moja ya madhaifu yaliyopelekea Simba kuruhusu mabao matatu dhidi ya Stand United ni uzembe uliofanywa na viungo pamoja na safu ya ulinzi kujisahamu kurudi kujilinda kwa haraka wanapopoteza mpira langoni kwa adui.

“Wote wanacheza vizuri, lakini wakipoteza mipira inakuwa ngumu sana kuipata tena, wanajisahau katika hilo, wanakuwa kama viungo washambuliaji. Katika mechi na Stand tumeona Mkude na Mzamiru wote wakipoteza mipira na walikuwa wanachelewa kukaba,” alisema Lechantre baada ya mchezo dhidi ya Stand United.

“Tuna mchezaji kama Kazimoto yupo vizuri, lakini naye ni kiungo mshambuliaji, hivyo inatubidi tumbadili nafasi James Kotei ambaye kwa sasa amemaliza matatizo ya nafasi ya ulinzi. Nikisema nimpange Kotei kama kiungo na Juuko Murshid acheze beki, bado tunayumba,” alisema.