Wakati wakihitaji kupata ushindi wa zaidi ya mabao manne dhidi ya Kaizer Chiefs leo, Simba inawahitaji sana Clatous Chama, Luis Miquissone na Larry Bwalya kuwa katika ubora wao
Nyota hawa wametengeneza 'utatu' ambao kama uko katika ubora hakika hakuna wa kuwazuia
Miquissone aliweza kufunga mabao katika michezo mitatu ya hatua ya makundi iliyopigwa jijini Dar es salaam dhidi ya Al Ahly, AS Vita na Al Merrikh
Chama na Bwalya wakahusika katika michezo dhidi ya AS Vita na Al Merrikh
Nyota hawa wanaweza kuamua Simba ichezeje leo, wataamua Simba ishinde mabao mangapi, wataamua kama mashabiki wa Simba leo watarejea nyumbani wakiwa na furaha au huzuni
Aidha, ni mchezo ambao pengine unatamani kumuona uwanjani winga Bernard Morrison ili kuwaongezea presha walinzi wa Kaizer Chiefs
Pamoja na uwepo wa utatu huo, Morrison ni mchezaji wa kipekee anayeweza kukimbia na mpira na kulazimisha walinzi kufanya makosa
Hii ni aina ya michezo ambayo Morrison anaimudu na husababisha madhara
Morrison pia amewahi kucheza soka Afrika Kusini hivyo anayo faida ya kuwafahamu Kaizer na utamaduni wa soka lao
Nyota hawa wataongeza chachu tu, ukweli ni kuwa kila mchezaji wa Simba atakayepewa nafasi ya kucheza leo, anapaswa kujitoa kwa asilimia 100
Safu ya ulinzi inapaswa kuongeza umakini, kwani Kaizer wao watakuwa wakitafuta bao moja tu ambalo linaweza kuvuruga hesabu za Simba
Kaizer wakifunga bao Simba italazimika kushinda kwa mabao sita, hivyo umakini katika ulinzi utahitajika sana
Paschal Wawa, Joash Onyango, Shomari Kapombe na Mohammed Hussein, wamejifunza kilichotokea Afrika Kusini leo hawapaswi kuwapa nafasi wachezaji wa pembeni kupiga krosi kwani Kaizer silaha yao kubwa ni mipira hiyo
