Nahodha msaidizi wa Simba Mohammed Hussein 'Zimbwe Jr' amesema licha ya kupoteza mchezo wa mkondo wa kwanza ligi ya mabingwa dhidi ya Kaizer Chiefs, wanayo nafasi ya kuipigania Simba katika mchezo wa marudiano utakaopigwa wiki ijayo jijini Dar es salaam
Usiku wa jana haukuwa mzuri kwa wachezaji na mashabiki wa Simba baada ya kuishuhudia timu yao ikipoteza mchezo kwa kufungwa mabao 4-0
Ni matokeo ambayo hakuna aliyetayatarajia hasa kutokana na ubora ambao Simba imeonyesha kwenye michuano ya ligi ya mabingwa msimu huu
"Tumepoteza mchezo leo lakini huu sio mwisho, tunayo nafasi ya kuonyesha sisi ni Simba. Tutarejea tukiwa imara," alisema Zimbwe Jr
Simba inatarajiwa kurejea jijini Dar es salaam leo kuanza maandalizi ya mchezo huo wa mkondo wa pili utakaopigwa May 22 katika uwanja wa Benjamin Mkapa
Mabingwa hao wa soka Tanzania Bara wanahitaji ushindi wa kuanzia mabao 5-0 ili kuweza kutinga nusu fainali
Hakuna lisilowezekana kwenye mchezo wa mpira wa miguu
