Kocha Msaidizi wa Simba Selemani Matola amesema walitambua changamoto ya hali ya hewa ndio maana wakawahi kwenda Afrika Kusini kufanya maandalizi ya mchezo wa robo fainali ligi ya mabingwa dhidi ya Kaizer Chiefs
Kwa sasa Afrika Kusini ni kipindi cha baridi kali ambapo hali hiyo iliwasumbua kidogo wachezaji katika siku yao ya kwanza
Baada ya kufanya mazoezi kwa siku mbili, Matola amesema wachezaji wameizoea hali hiyo na hivyo wako tayari kwa mchezo wa keshokutwa
"Tunashukuru tunaendelea vyema na maandalizi. Baridi ni kali lakini imekuwa vyema kwetu kwani tumepata muda wa kuzoea, muhimu zaidi tunafanya mazoezi katika muda ambao mchezo utachezwa (saa 12 jioni)"
"Mchezo dhidi ya Chiefs hautakuwa mwepesi kana wengi wanavyouchukulia. Kaizer Chiefs ni timu nzuri inayocheza soka la kasi lakini nasi tunajipanga kuhakikisha tunafanya vizuri katika mchezo huo," alisema Matola
Naye Mtendaji Mkuu wa Simba Barbara Gonzalez amesema wao kama viongozi wametimiza wajibu wao kwa kuhakikisha timu inapata kila wanachohitaji kuelekea mchezo huo
"Maandalizi yanakwenda vizuri. Kama viongozi tunazungumza na wachezaji na kuwahamasisha kuhakikisha wanatimiza malengo ya klabu. Kuna mambo mengi tumewaahidi lakini kikubwa ipo bonus kubwa sana kwao kama wataweza kutuvusha katika hatua hii," alisema Barbara
Mchezo dhidi ya Chiefs utapigwa Jumamosi, May 15 katika uwanja wa FNB zamani ukiitwa Soccer City, muda wa mchezo ni saa moja kwa saa za Tanzania
