Jana Kocha Msaidizi wa Simba Selemani Matola alisema hawana presha yeyote kuelekea mchezo dhidi ya Yanga ambao utapigwa baadae leo katika uwanja wa Benjamin Mkapa
Matola alisema msimu huu Simba imecheza mechi kubwa na miamba wa soka kama Al Ahly, AS Vita, Al Merrikh, Al Hilal na hata Fc Platinum ambao wote walichezea vichapo hapo kwa Mkapa
Wachezaji wa Simba wako tayari kucheza na Yanga, utayari huo umedhihiri hata kabla ya mchezo
Katika miaka mitano iliyopita Simba imepoteza mchezo mmoja tu dhidi ya Yanga, itoshe kusema matokeo ambao huwa Yanga wanapata dhidi ya Simba ni bahati tu
Afisa Habari wa Simba Haji Manara amezungumza mara nyingi, kuwa Simba ya msimu huu ndio kikosi bora kilichowahi kutokea katika historia ya klabu ya Simba
Maneno haya yanabebwa na takwimu, hapa tunazungumzia Simba ambayo iko robo fainali ya michuano ya ligi ya mabingwa baada ya kuvitikisa vigogo vya soka barani Afrika
Kuna vigogo hawatamani kukutana na Simba kwenye michuano hiyo, hizo ni timu zilizokamilika kwelikweli lakini zinamgwaya 'Mnyama'
Leo Simba inakwenda kufanya kile ambacho wamekifanya mara nyingi pale kwa Mkapa msimu huu, kushinda
Itakuwa mpira unadunda kwelikweli kama Mnyama atashindwa kupata matokeo dhidi ya Yanga leo
Ni siku ya furaha kwa mashabiki wa Simba, wengi wanatarajiwa kujitokeza kwa wingi kuiunga mkono timu yao
Pengine historia nyingine ya matokeo ya dabi inaweza kuandika leo. Simba imeshaifunga Yanga kuanzia bao moja hadi sita, historia inayosubiriwa ni kuvuka mabao sita!
