Jumamosi ijayo moto utawaka pale uwanja wa Benjamin Mkapa wakati mabingwa wa nchi Simba watakaposhuka dimbani kuwakabili watani zao Yanga katika mchezo wa duru la pili, ligi kuu ya Vodacom
Jana 'Lunyasi' walikuwa hapo kwa Mkapa kugawa dozi kwa Kagera Sugar, wakiondoka na ushindi wa mabao 2-1 na kutinga robo fainali ya michuano ya kombe la Shirikisho la Azam
Jina la winga Bernard Morrison lilitajwa sana baada ya mchezo huo kutokana na kazi nzuri aliyofanya
Simba ilikwenda mapumziko ikiwa nyuma kwa bao 1-0. Lakini alipoingia Morrison katika kipindi cha pili, akafanya kazi yake vyema akifunga bao moja na kutengeneza la pili
Mikimbio yake iliwapa wakati mgumu Kagera Sugar waliokuwa wanajilinda kwa muda wote wa kipindi cha pili kujinusuru na kipigo cha mbwa koko kutokana na msako mkali uliokuwa ukifanywa na Simba
Bahati mbaya kocha Didier Gomes amekuwa akimtumia Morrison akitokea 'sub' lakini kama angekuwa akimuanzisha pengine Simba ingekuwa ikinufaika zaidi na uwepo wake
Pengine ndio sababu mashabiki wanataka kumuona Morrison akianza katika mchezo ujao dhidi ya waajiri wake wa zamani, Yanga
Morrison aliifunga Simba wakati alipokuwa Yanga pengine hii ni nafasi yake kuwalipa Wanamsimbazi kwa kulirejesha bao lile alilofunga Machi 08 2020
"Morrison alibadili mchezo kwenye kipindi cha pili, ana kasi na mara nyingi anapopata mpira yeye hutizama mbele tu. Haijalishi Simba imefunga mabao mangapi, yeye anapokuwa uwanjani anafikiria kufunga au kutengeneza nafasi ili wenzake wafunge. Nadhani kocha anapaswa kumuanzisha kwenye mchezo dhidi ya Yanga Jumamosi," alisema shabiki aliyejitambulisha kwa jina la Sayeed
Katika mchezo wa duru ya kwanza uliomalizika kwa matokeo ya sare ya bao 1-1 Morrison hakuwa sehemu ya kikosi kilichocheza mchezo huo
Lakini hakuna shaka Jumamosi watakutana nae pale kwa Mkapa
