Afisa Habari wa klabu ya Simba Haji Manara amethibitisha kuwa ziko timu zimeonyesha nia ya kutaka kumsajili beki kisiki Joash Onyango raia wa Kenya
Onyango amekuwa katika kiwango bora sana hasa katika michuano ya ligi ya mabingwa ambayo Simba ilitinga robo fainali kibabe kwa kuongoza kundi A
Manara amesema thamani ya mchezaji huyo ni Tsh Bilioni 2 hivyo kama kuna timu itaweka fedha hiyo mezani, hawana hiyana kumuachia
"Vilabu vikubwa zimevutiwa na uwezo wa Onyango (Joash). Thamani yake ni Ksh 100 million (zaidi ya Bilioni 2 kwa pesa ya Tanzania), kwa yeyote atakayeweka dau hilo mezani, basi tutamruhusu amchukue Onyango lakini kinyume na hivyo Onyango hataenda kokote," alisema Manara
Onyango na Luis Miquissone ni wachezaji wanaotajwa kuzivutia timu vigogo barani Afrika na pengine kama Simba itaamua kuwauza itavuna fedha nyingi sana
Lakini Simba nayo inawahitaji wachezaji wao katika kutengeneza kikosi bora kitakachopata mafanikio barani Afrika
