Mabingwa wa nchi Simba keshokutwa Jumatano watashuka kwenye uwanja wa Benjamin Mkapa kuikaribisha Mtibwa Sugar katika mwendelezo wa ligi kuu ya Vodacom
Mchezo huo utapigwa kuanzia saa moja kamili usiku
Kocha Mkuu wa Simba Didier Gomes amesema wanarejea kwenye ligi kwa lengo moja tu, kuhakikisha wanafanikisha mpango wa kutetea ubingwa
Gomes amesisitiza kuwa Simba haitapuuza michuano yoyote, lengo kuu ni kushinda ubingwa wa ligi kuu pamoja na FA huku pia wakiwa na nafasi ya kufanya makubwa zaidi kwenye michuano ya ligi ya mabingwa barani Afrika ambayo wako hatua ya robo fainali
"Tunahitaji kufanya vizuri katika kila shindano, tumetinga hatua ya robo fainali katika Ligi ya Mabingwa Afrika, lakini bado tuna jukumu la lufanya vizuri kwenye Kombe la FA na Ligi Kuu ya Tanzania, hayo ndio malengo yetu," amesema Gomes
Aliongeza morali waliyonayo wachezaji wake kupitia michuano ya Ligi ya Mabingwa Afrika, inampa matumaini ya kuendelea kupata matokeo chanya katika michezo itakayofuata.
"Hatutajamaliza kazi, bado msimu haujamalizika, naweza kusema safari inaelekea mwisho lakini hatujaimaliza, tunahitaji kuendelea kujituma ili tufikie malengo ya kila mmoja wetu"
Baada ya mchezo dhidi ya Mtibwa Sugar Jumatano, Simba itasafiri kwenda Shinyanga kuwafuata Mwadui FC katika mechi itakayochezwa Aprili 18, mwaka huu na siku tatu baadaye itakuwa Bukoba kuwavaa wenyeji Kagera Sugar na Aprili 24, mwaka huu itawafuata Gwambina FC
