Kocha Mkuu wa Simba Didier Gomes amesema kuwa hakuna ukweli wowote kuhusu tetesi zinazomuhusisha mlinda lango Aishi Manula na klabu ya Al Merrikh inayotajwa kumuwania kipa huyo namba moja kwa klabu ya Simba na timu ya Taifa
Aidha Gomes amesema hashangazwi na tetesi hizo kwani alitarajia kutokana na ubora aliionyesha Manula katika michuano ya ligi ya mabingwa msimu huu, timu nyingi zitatamani kuwa nae lakini Simba hawatakuwa tayari kumruhusu aondoke
"Hizo taarifa hazina ukweli wowote, mimi nilikuwa kocha wa Merrikh miezi michache iliyopita hivyo nafahamu mikakati yao na niwahakikishie mashabiki wa Simba kuwa Manula atabaki Simba. Kwa sasa yupo kwenye kiwango kizuri na kila timu itahitaji kuwa na kipa kama yeye lakini kwakuwa na Simba ni timu kubwa, basi ataendelea kuwa hapa," alisema Gomes
Manula ameweka rekodi ya kipekee kwenye michuano ya ligi ya mabingwa msimu huu akiruhusu bao moja tu katika michezo minne aliyocheza kwenye hatua ya makundi
Katika kampeni yote ya michuano hiyo, Manula ameruhusu mabao mawili tu
