Wanamsimbazi na Watanzania wazalendo jioni ya leo macho na masikio yao yatakuwa pale uwanja wa Benjamin Mkapa kushuhudia mchezo wa ligi ya mabingwa kati ya Simba dhidi ya AS Vita
Mchezo huo utapigwa kuanzia saa kumi Alasiri mbele ya mashabiki 10,000 walioruhusiwa na Shirikisho la Mpira wa Miguu Tanzania (TFF)
Ni mchezo ambao kila mmoja ana mategemeo makubwa kuwa Simba itashinda na kufanikiwa kutinga robo fainali ya michuano hiyo kwa mara ya pili katika kipindi cha miaka mitatu iliyopita
Hata matokeo ya sare yatatosha kuivusha Simba robo fainali, matokeo ambayo yatakuwa na manufaa kwa nchi pia kwani itakuwa uhakika msimu ujao Tanzania itaingiza timu nne kwenye michuano ya Kimataifa
Ni mchezo ambao kocha Didier Gomes na vijana wake watapaswa kuingia kwa tahadhari kwani AS Vita nao wataingia wakisaka ushindi na sio vinginevyo
Hii ni siku nyingine ya kihistoria kwa Simba, dua zote ni kwa Wawakilishi hawa wa nchi waweze kupata matokeo ambao yatarudisha sifa kwa nchi na kuitangaza ligi yetu Kimataifa
Kufuzu hatua ya robo fainali utakuwa mwanzo mwema wa kutimiza ndoto kubwa zaidi, kufika nusu fainali na zaidi kutwaa ubingwa wa Afrika
Mungu ibariki Simba, Mungu ibariki Tanzania...!
