Mabingwa wa nchi Simba kesho Jumamosi April 03 majira ya saa kumi jioni watashuka uwanja wa Benjamin Mkapa kusaka matokeo muhimu ambayo yatawapeleka robo fainali ya michuano ya ligi ya mabingwa dhidi ya AS Vita
Simba inahitaji kushinda kwa idadi yoyote na mabao au hata kutoka sare ya aina yoyote kutinga robo fainali
Kwa maana nyingine, Mnyama kesho hapaswi kupoteza mchezo ajihakikishie kwenda robo fainali
Kocha Msaidizi wa Simba Selemani Matola amesema ni lazima washinde mchezo huo ili waweze kutinga robo fainali
Akizungumza na wanahabari mapema leo, Matola alisema wachezaji wote wako katika hali nzuri, maandalizi wamefanya ya kutosha, wako tayari kuwapa furaha Watanzania
"Kesho ni lazima tupate matokeo ili tusonge mbele, tumejipanga kupata matokeo. Tunamshukuru Mungu hakuna mchezaji ambaye tutamkosa, wote wapo kambini na hilo linatupa mwanga kuwa tunaweza kufanya vizuri," alisema
Naye nahodha wa Simba John Bocco amesema uzoefu na maandalizi mazuri waliyofanya ni silaha muhimu kuelekea mchezo wa kesho pale uwanja wa Benjamin Mkapa
"Kwa upande wetu kama wachezaji tuko vizuri, tuna ari nzuri ya kuweza kupambana ili kufikia malengo ya timu yetu. Tumefanya maandalizi mazuri na tunaamini Mungu atatusaidia na tutafuzu hatua ya robo fainali. Tuna wachezaji wenye uzoefu mkubwa na wanaoelewa kwanini wapo kwenye klabu. Tuko tayari," amesema Bocco
