Djuma aeleza sababu ya kumtoa Ndemla mapema

Kocha Msaidizi wa Simba Masudi Djuma ametaja sababu ya kumtoa mapema kiungo Said Ndemla kwenye mchezo dhidi ya Mbao FC ambapo Simba iliibuka na ushindi wa mabao 5-0.

Ndemla alitolewa kwenye dakika ya 30 na nafasi yake kuchukuliwa na Mzamiru Yassini.

Djuma aliwaambia waandishi wa habari baada ya mchezo kuwa waliona haikuwa siku nzuri kwa kiungo huyo kwani hakuwa kwenye kiwango chake cha siku zote.

“Unajua siku hazifanani, huenda leo hakuamka vizuri kwa hiyo huwezi kumkawiza kumtoa kwa sababu siku nyingine huwa anafanya vizuri," alisema Djuma.

"Kama huwa anafanya vizuri, leo hakufanya vizuri, Simba haina mchezaji mmoja, wapo na wengine kama mtu hajaonesha kiwango unampa nafasi mwingine kuliko kuendelea kumwacha wakati game imemkataa.

"Amefanya mistake kidogo hakuwa sawa leo, tukamuingiza mtu mwingine akarekebisha makosa mambo yanaendelea."

Aidha Djuma amepuuza tukio la Ndemla kugoma kumpa mkono kocha huyo baada ya kutolewa.

"Hata mwanamke nyumbani kuna siku mnashindwa kusalimiana na kupeana mkono, hakupi hata kiss hiyo ni mambo ya kawaida kupewa mkono sio lazima lakini kama mchezaji game imemkataa tunamtoa tuna muweka mwingine"

“Wakati Ndemla anatolewa Simba ilikuwa haijafunga goli hata moja lakini baada ya Mzamiru kuingia yakapatikana magoli mawili ya haraka. Mzamiru alitoa assist ya goli la tatu ambalo lilifungwa na Okwi kipindi cha pili."