Winga Luis Miquissone amekuwa na msimu mzuri sana aking'ara kwenye kikosi cha Simba katika michuano ya ligi ya mabingwa barani Afrika
Akiwa ameweka kambani mabao mawili, Miquissone ametajwa katika kikosi bora cha wiki mara mbili
Aliingia kwa mara ya kwanza baada ya ushindi wa bao 1-0 dhidi ya Al Ahly yeye akiwa mfungaji pekee wa bao hilo
Akafunga tena katika mchezo dhidi ya Al Merrikh na kuingia tena katika kikosi cha wiki
Haya ni mafanikio makubwa kwa Miquissone aliyejiunga na Simba mwishoni mwa mwaka 2019 akitokea klabu ya Mamelodi Sundowns
Katika moja ya mahojiano yake, Miquissone alisema anajisikia fahari kutajwa katika kikosi bora cha wiki mara mbili akieleza kuwa mafanikio hayo ni chachu kwake kufanya bidii zaidi
Alisema yeye na wachezaji wenzake wataendelea kupambana ili kuhakikisha wanafikia malengo ya timu kwani kwake mafanikio binafsi hayawezi kuwa na maana kama hawatafanikiwa kitimu
Miquissone yuko Msumbiji akitimiza majukumu ya timu ya Taifa lakini April 03 atakuwa pale kwa Mkapa katika mchezo wa ligi ya mabingwa dhidi ya As Vita, mchezo ambao Simba inahitaji angalau alama moja kutinga robo fainali
