Nyota wa zamani wa Simba Amir Kiemba ambaye sasa ni mchambuzi mahiri wa soka, amesema Simba inapaswa kujipanga kuhakikisha inapata ushindi katika mchezo wao dhidi ya Al Merrikh kwani ni wazi kama hawatapata matokeo mechi mbili zitakazobaki zitakuwa ngumu zaidi
Kiemba amesema kuna kila dalili nguvu za ziada zimeanza kutumika kuhakikisha Simba haisongi mbele baada ya kufanya vizuri mechi zake za mwanzo na kuwaweka kwenye hatihati ya kuwania nafasi moja ya kufuzu vigogo Al Ahly na AS Vita
"Kwa namna ambavyo Kundi A linakwenda, inaonekana kama Simba imevuruga matokeo ambayo tayari yalishakuwepo kwenye makaratasi"
"Kwa sababu baada ya kundi kupangwa, kuna timu ambazo tayari watu walikuwa wanafikiria zitafuzu. Kuna msemo unasema, ukiomba mafanikio ujue maadui wanaongezeka. Kwa hiyo sasa hivi maadui wa Simba wameongezeka na wanataka kuhakikisha ile nafasi yao inapotea"
"Nafikiri hata kuzuia mashabiki ni njia ya kuivuruga timu na uongozi kwa ujumla. Sasa hivi vita imeshakuwa kubwa, hata mechi ya kesho naona Simba inacheza na kundi zima sio na Al Merrikh peke ake"
"Kwa hiyo naiona ni mechi ngumu sana nje na ndani ya uwanja. Kwa hiyo viongozi na timu kwa ujumla wanatikiwa kuiendea mechi hii kwa tahadhari kubwa kuliko hata walivyokuwa wanachukulia mechi zilizopita," alisema Kiemba
