Kocha Mkuu wa Simba Didier Gomes amesema watajilaumu wenyewe kwa kushindwa kuibuka na ushindi dhidi ya Tanzania Prisons katika mchezo uliopigwa uwanja wa Benjamin Mkapa jana usiku
Mchezo huo ulishuhudia maafande wa Tanzania Prisons wakipata sare ya bao 1-1 dhidi ya Simba
Akizungumza baada ya mchezo huo, Gomes alisema walitengeneza nafasi nyingi lakini hawakuwa makini katika umaliziaji
Kocha huyo raia wa Ufaransa alisema wanahitaji kufanyia kazi kutumia nafasi za mipira ya adhabu kwani hawana uwiano mzuri wa kufunga mabao kupitia mipira hiyo
Mshambuliaji Chris Mugalu alikosa mkwaju wa penati, akiungana na Meddie Kagere ambaye pia alikosa katika mchezo wa kombe la FA dhidi ya African Lyon
"Tunahitaji kufanyia kazi eneo letu la ushambuliaji hasa matumizi ya mipira ya adhabu. Nafikiri hatukuwa makini kwa ujumla"
"Tulikuwa na changamoto kwenye safu ya ulinzi lakini kwa sasa tuko sawa, nafurahia kuona hatufanyi makosa mengi"
"Tumekubali matokeo, tunajipanga kwa mchezo ujao, ligi bado ni ndefu bado kuna mechi nyingi mbele yetu," alisema Gomes
Baada ya mchezo huo Simba inahamishia nguvu zake kwenye michuano ya ligi ya mabingwa ambapo Jumanne ijayo watashuka uwanja wa Benjamin Mkapa kuikaribisha Al Merrikh katika mchezo muhimu ambao Simba inahitaji ushindi
