Kocha Mkuu wa Simba Didier Gomes, amesema licha ya kuwaheshimu wapinzani wake katika mchezo wao dhidi ya Tanzania Prisons utakaopigwa uwanja wa Benjamin Mkapa kesho Jumatano, anaamini kikosi chake kitaibuka na ushindi kwenye mchezo huo.
Simba inaingia katika mchezo huu ikiwa na kumbukumbu nzuri ya ushindi wa mabao 3-0 kwenye mchezo wao uliopita dhidi ya JKT Tanzania
Gomes amesema kikosi chake kiko tayari kwa mchezo huo na lengo lao ni kuhakikisha wanashinda ili kuongeza alama ambazo zitawasogeza karibu na uongozi wa ligi
"Kikosi chetu kiko tayari kwa ajili ya mchezo wetu dhidi ya Tanzania Prisons, tunajua hautakuwa mchezo rahisi kutokana na uhalisia wa timu ambayo tunakwenda kucheza nayo"
"Simba ilipoteza mchezo wa mzunguko wa kwanza dhidi ya timu hii, na hivyo tunapaswa kuwa makini zaidi dhidi yao kwani hiyo inaonyesha ni kwa kiasi gani wana timu ambayo inaweza kupambana"
"Lakini matokeo ya ushindi katika mchezo huu ni ya muhimu kwetu, tunapaswa kushinda ili kuendelea kuusogelea zaidi uongozi wa ligi ambayo kwa sasa inashikiliwa na Yanga," amesema Gomes
Simba iko nafasi ya pili kwenye msimamo wa ligi ikiwa na alama 45 lakini ikiwa imeshuka dimbani mara 19
Mabingwa hao wa nchi wana michezo minne ya viporo, ushindi katika michezo yote utawafanya waongoze ligi kwa tofauti ya alama saba
