Mlinzi wa kulia wa Simba na timu ya Taifa, Shomari Kapombe ametamba kuwa wamejipanga vizuri kuhakikisha wanafika mbali kwenye michuano ya Ligi ya Mabingwa Afrika msimu huu.
Baada ya kulazimishwa suluhu ya bila kufungana dhidi ya Al Merrikh nchini Sudani, Simba imeendelea kuongoza kundi A baada ya kujikusanyia alama saba, alama tatu mbele ya AS Vita na Al Ahly zenye alama nne kila moja
Kapombe amesema mpaka sasa wamekuwa na msimu bora zaidi katika michuano hiyo
Anaamini wakiendelea kujituma watafika mbali sana malengo makuu yakiwa angalau kuvuka hatua ya robo fainali
"Tumekuwa na wakati mzuri msimu huu, ni jambo zuri na la kujivunia kwetu kama timu. Kikosi kimekuwa na ushirikiano mkubwa na bila shaka kuendana na plani ambazo tunazo naamini tutafika mbali katika michuano hii kulinganisha na misimu mingine tuliyoshiriki," alisema Kapombe
Simba itarudiana na Al Merrikh Jumanne ijayo katika mchezo utakaopigwa uwanja wa Benjamin Mkapa
Ushindi katika mchezo huo, utaifanya Simba ihitaji alama moja tu kuweza kuvuka hatua ya robo fainali
Mabingwa hao wa nchi wana michezo miwili nyumbani dhidi ya Al Merrikh na AS Vita wakati mchezo wa mwisho watasafiri nchini Misri kuikabili Al Ahly
