Mabingwa wa nchi Simba jioni ya leo wataendelea na majukumu ya kuiwakilisha nchi Kimataifa watakaposhuka dimbani huko Sudan kuikabili Al Merrikh ukiwa ni mchezo wa raundi ya tatu, michuano ya ligi ya mabingwa barani Afrika
Vijana wa kocha Didier Gomes wanahitaji kushinda mchezo huu ili kujiweka katika nafasi nzuri ya kutinga robo fainali
Vinara hao wa kundi A, wanafahamu ushindi katika mchezo wa leo na ule wa marudiano ambao utapigwa jijini Dar es salaam siku 10 zijazo, unaweza kutosha kuipeleka Simba robo fainali bila ya kujali matokeo ya mechi mbili zitakazokuwa zimebaki dhidi ya AS Vita na Al Ahly
Mchezo utapigwa kuanzia saa tisa Alasiri kwa saa za Sudan ambako huku Tanzania itakuwa ni saa kumi jioni
Gomes amesema vijana wake wako tayari kwa mchezo huo ambao wanatarajia utakuwa na ushindani mkali
Kocha huyo raia wa Ufaransa amesema anawafahamu vizuri Al Merrikh ikiwa ni timu aliyokuwa akiifundisha kabla ya kutua Simba hivyo amewaandaa vijana wake kimbinu kuweza kupata matokeo leo
Naye Afisa Habari wa Simba Haji Manara amesema timu iko kamili kuelekea mchezo huo, amewataka mashabiki wa Simba na Watanzania wazalendo kuwaombea dua kwani ushindi wao ni ushindi wa nchi
Kila la kheri mabingwa, kila la kheri wawakilishi wa nchi
