Mabingwa watetezi ligi kuu ya Wanawake 'Serengeti Lite', Simba Queens, jioni ya leo Ijumaa, watashuka pale uwanja wa Uhuru kupepetana na wapinzani wao wa jadi Yanga Princess
Ushindi katika mchezo huu, utairudisha Simba Queens kileleni mwa msimamo wa ligi hiyo na kuwa katika nafasi nzuri ya kutetea ubingwa wao
Yanga Princess wanaongoza ligi wakiwa na alama 38 wakati Simba Queens wana alama 36
Timu zote hazijapoteza mchezo msimu huu lakini vijana wa Mussa Mgosi wameahidi kumaliza ubishi wa ipi ni timu bora msimu huu
Afisa Habari wa Simba Haji Manara ambaye yuko nchini Sudan na kikosi cha mabingwa wa nchi, ametuma salamu za ushindi kwa Simba Queens akiwataka mashabiki wa Simba wajitokeze kwa wingi uwanja wa Uhuru kuiunga mkono timu yao
Manara amesema kama ilivyokuwa msimu uliopita, hata msimu huu wamejipanga kutwaa kila taji rasmi
"Msimu huu tutashinda mataji yote kuanzia ligi kuu, FA, Ligi ya Wanawake, Ligi ya Vijana, lile la Mapinduzi tuliwaachia kwa sababu tuliombwa," alitamba Manara
"Sisi huku timu iko sawa kwa ajili ya mchezo wa ligi ya mabingwa, tunawatakia kila la kheri Simba Queens washinde. Mashabiki wa Simba tujitokeze kwa wingi uwanja wa Uhuru kuiunga mkono timu yetu"
