Mkuu wa Kitengo cha Habari na Mawasiliano klabu ya Simba, Haji Manara amesema kikosi kimeondoka nchini kuelekea Sudan wakiwa na matumaini makubwa ya kufanya vizuri kwenye mchezo wa ligi ya Mabingwa dhidi ya Al Merrikh ambao utapigwa Jumamosi
Akizungumza muda mfupi kabla ya kuanza safari, Manara amesema wanatambua wanakwenda kukabiliana na timu ambayo inahitaji ushindi kwa gharama yoyote baada ya kupoteza michezo yao miwili ya kwanza
"Tunakwenda Sudan huku tukifahamu tunakabiliwa na mchezo mgumu dhidi ya Al Merrikh. Mabingwa hawa wa Sudan wamepoteza mechi zao mbili hivyo watakuwa na malengo ya kusaka ushindi. Hata hivyo sisi tuko imara, wachezaji wote wako kamili, hatuna majeruhi na tunakwenda kupambana"
"Tumejiwekea malengo makubwa ya kufanya vizuri katika michuano hii ya ligi ya mabingwa msimu huu, muhimu tunawaomba Watanzania na Wanasimba mnaobaki nyumbani mtuombee duwa ili tuweze kufanya vizuri," alisema Manara
Simba imeondoka nchini na kikosi cha wachezaji 25. Itasafiri mpaka Ethiopia ambako wataunganisha ndege kuelekea nchini Sudan
