Maafande wa JKT Tanzania wamekimbizwa mchaka mchaka na mabingwa wa nchi Simba katika mchezo wa ligi kuu ambao wamekubali kipigo cha mabao 3-0
Ulikuwa mchezo wa upande mmoja hasa kwenye kipindi cha kwanza Simba ikitawala kwa asilimia 76% na kumaliza kipindi hicho wakiwa mbele kwa mabao mawili
Mnyama Chris Mugalu ndiye aliyeitanguliza Simba kwa bao safi kwenye dakika ya 9 akimalizia krosi murua iliyochongwa na Luis Miquissone
Hilo lilikuwa bao la tano kwa Mugalu kwenye ligi msimu huu
Miquissone aliongeza bao la pili kwenye dakika ya 37 akimalizia pasi murua ya mkongwe Erasto Nyoni
Bao la tatu liliwekwa kambani na nahodha, Papaa John Bocco ambaye huo ni mchezo wake wa pili tangu arejee kutoka kwenye majeraha
Hilo lilikuwa bao lake la tisa sasa akifungana na Meddie Kagere wakiwa vinara wa kuzifumania nyavu
Ni ushindi unaoisogeza Simba karibu kabisa na 'nafasi yake' sasa zikiwa zimesalia alama nne baada ya Machampioni hao wa Tanzania kufikisha alama 45
Baada ya mchezo huo Simba inarejea kwenye mikiki mikiki ya ligi ya mabingwa, wakitarajiwa kusafiri kuelekea nchini Sudan kwa ajili ya mchezo dhidi ya El Merrekh utakaopigwa March 05
