Kiungo wa Simba Francis Kahata amemwagia sifa beki kisiki Joash Onyango kwa kuonyesha kiwango bora ndani ya kikosi cha mabingwa hao wa nchi
Katika mchezo dhidi ya Al Ahly, Onyango aliiongoza safu ya ulinzi ya Simba kuwadhibiti washambuliaji wa mabingwa hao wa Afrika akicheza sambamba na mkongwe Paschal Wawa
Kocha Mkuu wa Al Ahly Pitso Masemane alimtaja Onyango kuwa ndiye mchezaji aliyemkubali zaidi kwenye mchezo huo pamoja na kuwa alitambua uwezo mkubwa ulioonyeshwa na mfungaji wa bao pekee Luis Miquissone
Kahata ambaye anacheza na Onyango katika timu ya Taifa ya Kenya, amesema tangu amfahamu Onyango, ni mchezaji anayeimarika kila siku
"Namfahamu Onyango, ni mtu asiyependa masihara anapokuwa kazini. Huwa hafanyi makosa ya kizembe, yuko hivyo tangu wakati tukicheza Gor Mahia"
"Nafurahi kumuona anakuwa bora kila uchao. Amekuja hapa Tanzania, moja kwa moja ameingia kwenye kikosi cha kwanza cha Simba, amejihakikishia nafasi na amekuwa mfano wa kuigwa kwenye safu ya ulinzi. Ukitizama kiwango chake, utakubali, Onyango ana msaada mkubwa sana kwa Simba," alisema Kahata
Simba inafukuzia rekodi ya kutinga robo fainali ya michuano ya ligi ya mabingwa ikiwa kinara wa kundi A mbele ya mabingwa watetezi Al Ahly na wababe wa soka kutoka DR Congo, AS Vita
