Mwenyekiti wa Bodi ya Wakurugenzi klabu ya Simba Bilionea Mohammed Dewji 'Mo' amewataka wapenzi, wanachama na mashabiki wa mabingwa hao wa nchi kutobweteka na matokeo waliyopata kwenye michuano ya ligi ya mabingwa kwani bado safari ni ndefu
Simba imefanikiwa kukaa kileleni mwa kundi A michuano ya ligi ya mabingwa hatua ya makundi wakiwa wamejikusanyia alama sita baada ya ushidi dhidi ya vigogo wa soka barani Afrika Al Ahly na AS Vita
Mo amesema safari bado ni ndefu kuweza kufikia malengo yao hivyo muhimu ni dua za Wanasimba na Watanzania wote kuhakikisha wanafanikiwa
"Bado safari ni ndefu na ngumu: Wanasimba na Watanzania tunaomba dua zenu kwa Mwenyezi Mungu," alisema
Bilionea huyo kijana zaidi barani Afrika anatajwa kuwa sababu ya mafanikio ya klabu ya Simba kutokana na uwekezaji mkubwa alioweka
Ndoto yake kubwa ni kuona Simba inashinda taji la ligi ya mabingwa, dalili zikionekana katika michuano ya msimu huu kuwa jambo hilo linawezekana hasa baada ya Simba kuanza vizuri hatua ya makundi
