Jumapili Februari 28, 2021 Mamelodi Sundowns watashuka uwanja wa Benjamin Mkapa kuikabili CR Belouizdad kutoka nchini Algeria ukiwa ni mchezo wa ligi ya mabingwa
Mchezo huo unapigwa jijini Dar es salaam baada ya CR Belouizdad ambao ndio wenyeji wa mchezo huo kuomba upigwe nchini kufuatia Serikali ya Algeria kuinyima Mamelodi vibali vya kutua nchini humo kutokana na changamoto ya corona
Jana viongozi waandamizi wa Mamelodi walikuwepo uwanja wa Benjamin Mkapa wakiishuhudia Simba, mabingwa wa nchi wakiwaadhibu vikali Al Ahly kwa kuwachapa bao 1-0 katika mchezo ambao Al Ahly hawatausahau kutokana na 'pira biriani' walilokutana nalo kutoka kwa vijana wa Didier Gomes
Kama ilivyo kawaida, ushindi wa Simba ulichagizwa na mashabiki wake takribani 30,000 walioruhusiwa kushuhudia mchezo huo
Sasa baada ya mchezo viongozi hao wa Mamelodi wakamvaa Mtendaji Mkuu wa Simba Barbara Gonzalez wakiomba sapoti kutoka kwa Simba katika mchezo wao wa Jumapili
"Hongera sana kwa ushindi leo, nasi tutakuwa uwanjani hapa Jumapili. Tunaomba uwaambie mashabiki wenu waje watuunge mkono katika mchezo wetu," Afisa wa Mamelodi alisikika akiongea na Barbara
Simba kupitia Mtendaji wake Mkuu Barbara, ikaahidi kuwa nao bega kwa bega huku Barbara akiwaachia mawasiliano yake kwa ajili ya majadiliano zaidi
