Kocha Mkuu wa Biashara United Francis Baraza amesema kikosi cha Simba kina uwezo wa kupata matokeo chanya mbele ya Al Ahly ikiwa watacheza kwa nidhamu na utulivu mkubwa.
Leo Simba ina kazi ya kusaka pointi tatu mbele ya Al Ahly ya Misri. Mchezo ukitarajiwa kuchezwa majira ya saa 10:00 jioni na mashabiki 30,000 watapata fursa ya kushuhudia ndani ya Uwanja wa Mkapa
Baraza ambaye hivi karibuni timu yake ilichezea kichapo kutoka kwa Simba kwa kufungwa bao 1-0 kule Musoma, amesema kikosi cha Simba kiko vizuri na leo wanaweza kupata matokeo dhidi ya Al Ahly
"Simba wameanza vizuri na wanaweza kupata matokeo chanya , ila lazima waongeze nidhamu ndani ya uwanja na kupunguza makosa yasiyo ya lazima hasa kwa mabeki pamoja na viungo"
"Ikiwa watakuwa wanaruhusu makosa iwe ndani ya 18 ama karibu na 18 ni hatari kwao kwa kuwa wapinzani wao wanaweza kutumia kila nafasi na kugeuza kuwa bao, hapo umakini unahitaji," alisema Baraza
Huu ni mchezo unaozikutanisha timu ambazo zimeonyesha ubora katika michezo yao ya kwanza, Simba ikiifunga AS Vita bao 1-0 ugenini huku Al Ahly ikipata ushindi wa mabao 3-0 dhidi ya Al Marreikh kule Misri
