Kiungo fundi raia wa Jamhuri ya Kidemokrasia ya Congo, Doxa Gikanji maeitabiria Simba kufanya vizuri katika michuano ya ligi ya mabingwa mwaka huu baada ya ushindi wa bao 1-0 dhidi ya AS Vita ugenini
Nyota huyo mwenye umri wa miaka 30, anatarajiwa kujiunga na Simba mwezi Juni baada ya mchakato wa usajili wake kukwama kwenye dirisha dogo kutokana na kuwa na majukumu ya timu ya Taifa ya DR Congo iliyokuwa ikishiriki michuano ya CHAN ilifanyika Cameroon
Wakati Simba ikiwa DR Congo kwa ajili ya mchezo dhidi ya AS Vita, Gikanji alipata nafasi ya kuonana na viongozi pamoja na wachezaji wa Simba akiwapongeza baada ya ushindi huo
Gikanji anayeitumikia DC Motema Pembe, amesema Simba ina nafasi nzuri ya kutinga robo fainali ya michuano ya ligi ya mabingwa na wanaweza kufanya hivyo wakiwa na mechi mkononi
"Kikosi cha Simba kiko imara sana, nadhani kama watacheza hivi kwa mechi zao za nyumbani wanaweza kushinda zote. Na pia wana nafasi ya kupata alama nyingine ugenini, nafikiri wanaweza kufikisha alama 12 au zaidi na kuwa na uhakika wa kumaliza kwenye nafasi ya kwanza au ya pili"
"Sioni kama Simba wanaweza kushindwa kusonga mbele hatua ya robo fainali ya michuano hii," Gikanji alinukuliwa na Mwanaspoti
Gikanji alipaswa kuwa katika kikosi cha Simba kinachoshiriki ligi ya ndani lakini ushiriki wake wa michuano ya CHAN ulikwamisha usajili wake kwani ili asajiliwe na Simba alipaswa kuondoa jina lake kwenye kikosi cha DR Congo ambacho kilikuwa kimetinga robo fainali
Michuano ya CHAN ilihusisha wachezaji wanaocheza ligi za ndani yeye kusajiliwa na Simba ingemuondolea sifa ya kushiriki michuano hiyo
