Kama kuna mchezaji ambaye hazungumzwi sana katika kikosi cha Simba licha ya kazi kubwa anayofanya dimbani, basi ni Mzamiru Yassin
Huu ni mwaka wake wa nne yuko ndani ya kikosi cha Simba lakini mara chache utawasikia hata wachambuzi wa soka nchini wakimzungumzia
Ni kwa sababu Mzamiru hupewa majukumu maalum uwanjani, na huwatengenezea wachezaji wengine waweze kun'gara
Shiza Kichuya, kiungo wa zamani wa Simba ambaye alianza kucheza na Mzamiru tangu wako Mtibwa Sugar, aliwahi kusema kwake Mzamiru ni mchezaji aliyekamilika sana kuliko wachezaji wengi
Wakati huo Simba ilikuwa na changamoto katika safu yake ya ulinzi, Kichuya alitamani kuona Mzamiru akipewa majukumu katika safu hiyo kwani aliamini Mzamiru anaweza kucheza popote
Wengine wamempachika jina la utani 'punda', tunafahamu kazi kubwa ya punda ni kubeba mizigo kumrahisishia msafiri hasa maeneo ya Jangwani kwenye ukame
Huo ni mfano wa kazi ambayo Mzamiru huifanya pale Simba. Ni mchezaji ambaye utamuona muda wote akiwajibika uwanjani, huyu bwana ana mapafu ya mbwa!
Juzi Simba ilipata ushindi kule DR Congo katika mchezo wake wa kwanza ligi ya mabingwa hatua ya makundi kwa kuifumua AS Vita bao 1-0
Mzamiru alikuwa mtu muhimu sana katika eneo la kiungo cha ulinzi akishirikiana vyema na Injinia Taddeo Lwanga ambaye kwa hakika ndiye aliyekuwa nyota wa mchezo huo
