Kikosi cha Simba jana usiku kilifanya mazoezi yake ya kwanza katika Uwanja wa De Martyrs uliopo Kinshasa, DR Congo lakini katika hali ya kushangaza wakati wanaendelea na mazoezi hayo, msafara wa AS Vita ulifika katika uwanja huo kwa kile kilichoonekana kutaka kuibia mazoezi ya Simba ingawa jaribio hilo lilizimwa na viongozi wa Simba na Watanzania waishio hapa Kinshasa.
Mazoezi hayo yalifanyika saa 2.00 usiku jijini Kinshasa sawa na saa 4.00 usiku kwa saa za Afrika Mashariki na ghafla msafara wa AS Vita uliokua na wachezaji, maofisa wa benchi la ufundi na viongozi ulifika na kupaki basi lao nje ya uwanja huo unaoingiza mashabiki takribani 80,000.
Kitendo cha kuwasili kwa AS Vita katika muda ambao Simba walikuwa wanaendelea na mazoezi uwanjani hapo, kiliwafanya viongozi wa Simba na Watanzania wanaoishi hapa Kinshasa, kuongeza umakini na ulinzi katika kila pembe ya uwanja ambapo hawakuruhusu mtu yeyote kushuhudia mazoezi hayo hata kwa kuibia.
Iliwalazimu AS Vita kusubiri hadi Simba wamalize kufanya mazoezi yao na baada ya hapo waliingia uwanjani kwa ajili ya program zao za mazoezi
Mwanaspoti
