Simba imeondoka nchini Tanzania kuelekea DR Congo ikiwa na kikosi chenye wachezaji 27 ambapo Ijumaa, Februari 12 2021 watashuka dimbani kucheza mechi ya kwanza ya makundi ligi ya mabingwa dhidi ya AS Vita
Huu ni mchezo ambao Kocha Didier Gomes atahitaji kucheza kwa tahadhari hasa ikizingatiwa yuko ugenini
Miongoni mwa wachezaji aliowajumuisha katika kikosi chake ni beki kiraka Erasto Nyoni na kiungo Jonas Mkude ambaye hakuwa na timu kwa takribani mwezi mmoja akiwa amesimamishwa kwa makosa ya utovu wa nidhamu
Wakati wote ambao Mkude amekosekana kikosini, Mganda Taddeo Lwanga, amefanya majukumu yake vyema. Kiungo huyu aliyetua Simba kwenye usajili wa dirisha dogo, tayari ameanza kuzikonga nyoyo za mashabiki wa Simba ambao wanafurahia kazi yake
Wakati Simba inaondoka jijini Dar es salaam jana, Gomes alidokeza kuwa Mkude hatakuwa sehemu ya kikosi kitakachoshuka dimbani kule DRC kwa kuwa bado hayuko fiti
"Mkude ni mchezaji mzuri, lakini anahitaji kufanya mazoezi kwanza. Nilimtazama kwenye mchezo wa kirafiki dhidi ya timu yetu ya vijana, nafikiri hayuko tayari kwa mchezo," alisema Gomes
Hata hivyo Mfaransa huyo, alieleza kuvutiwa na mkongwe Erasto Nyoni na kuongez kuwa anaweza kuwa na msaada katika mchezo wa keshokutwa
"Nyoni yuko tayari zaidi, nafikiri anaweza kuwa na mchango wake kwenye eneo la kiungo katika mchezo dhidi ya AS Vita," alisema Gomes
Katika mchezo huo, huenda Gomes akaanza na viungo wakabaji wawili ili kuipa timu uwiano mzuri katika kujilinda kwani mchezo huo unatarajiwa kuwa na presha kubwa kutoka kwa wenyeji
