Wananchama wa klabu ya Simba kesho Jumapili watashiriki kwenye zoezi la uchaguzi wa kujaza nafasi ya Mwenyekiti iliyoachwa wazi na Swedi Mkwabi aliyejiuzulu nafasi hiyo mwaka jana
Kamati ya Uchaguzi ya klabu ya Simba imeeleza kuwa maandalizi ya uchaguzi huo yamekamilika ambapo ni wagombea wawili Juma Nkamia na Murtaza Mangungu watachuana
Wagombea hao walianza kampeni mapema wiki hii ambapo zoezi la kampeni litafungwa leo, saa 12 jioni
"Kesho utafanyika uchaguzi wa kujaza nafasi ya Mwenyekiti wa Simba wa wanachama. Wagombea wawili ndio watachuana kesho Murtaza Mangungu na Juma Nkamia. Wanachama wanatakiwa kujua hao ndio watawapigia kura," alisema Mwenyekiti wa Kamati ya Uchaguzi, Boniface Lihamwike katika Mkutano na Wanahabari mapema leo
Aidha Lihamwike amesema ili Mwanachama aruhusiwe kushiriki uchaguzi huo ni lazima awe amelipia ada ya uanachama wake
"Moja ya kigezo cha kupiga kura ni mwanachama kulipia ada ya uanachama hivyo kesho nje ya ukumbi wa mkutano kutakuwa na eneo maalumu ambalo watatumia wanachama ambao hawajalipa kufanya malipo"
Mkutano Mkuu unatarajiwa kuanza saa tatu asubuhi ili ukamilike mapema Wanachama waweze kuwahi mchezo dhidi ya Azam Fc utakaopigwa kuanzia saa moja jioni
Tiketi za mchezo dhidi ya Azam zitauzwa nje ya ukumbi wa mkutano na vituo vilivyotangazwa jana
