Wenye nafasi yao pale juu wanazidi kusogea baada ya ushindi wa mabao 2-1 dhidi ya Dodoma Jiji katika mchezo wa ligi kuu uliopigwa uwanja wa Jamhuri Mkoani Dodoma
Hapa tunawazungumzia mabingwa wa nchi Simba kwani baada ya ushindi huo wamefikisha alama 38 sasa wakihitaji alama sita tu kutoka mechi mbili za viporo wakae kileleni
Simba walianza taratibu mchezo huo, walikuwa wa kwanza kuhesabu bao la kuongoza kwenye dakika ya 31 kupitia kwa Meddie Kagere 'MK14' aliyemalizia krosi murua iliyochongwa na Wakili Msomi Bernard Morrison 'Mzee wa Kuwakera'
Pamoja na kutokuwa na mchezo mzuri sana leo lakini Morrison ndiye aliyeihakikishia Simba alama tatu muhimu akifunga bao la ushindi kwemye dakika ya 66
Dodoma Jiji walifunga bao lao pekee kwenye dakika ya 36 kupitia mpira wa kichwa uliopigwa na Cleofas Mkandala
Ni alama tatu muhimu ambazo Simba wameondoka nazo Dodoma na sasa wanarejea jijini Dar es salaam kwa ajili ya mchezo dhidi ya Azam Fc ambao utapigwa Jumapili
Huu ni ushindi wa kwanza kwa Kocha Didier Gomes katika ligi kuu ya Vodacom
Aidha Kagere amefikisha mabao nane akikaa kileleni kwenye vita ya kuwania kiatu cha dhahabu wakilingana na mshambuliaji mwenzake wa Simba nahodha John Bocco ambaye pia ameweka kambani mabao nane
Tutaelewana tu....!
