Kocha Mkuu wa Simba Didier Gomes ameeleza kuridhishwa na kiwango kilichoonyeshwa na wachezaji wake katika michuano ya Simba Super Cup iliyomalizika jana kwa Simba kuibuka mabingwa
Kupitia michuano hiyo, Gomes amesema ameweza kuwafahamu wachezaji wake wote na vile ambavyo anaweza kuwatumia katika kikosi chake
Gomes amesema timu yake imeonyesha uimara katika safu ya ulinzi lakini pia safu yake ya ushambuliaji ilikuwa bora pamoja na kuwa yapo maeneo ambayo atahitaji kuyafanyia kazi
"Binafsi nimefurahishwa na michuano hii kwani imenipa mwanga wa kikosi changu. Nimepata nafasi ya kufahamu uwezo wa mchezaji mmoja mmoja na hilo litanisaidia katika kuiandaa timu. Tulikuwa bora katika safu ya ulinzi pamoja na ushambuliaji, ingawa yapo maeneo ambayo tunapaswa kuyafanyia kazi," alisema Gomes
Baada ya michuano hiyo kukamilika, Simba imeanza maandalizi tayari kwa mechi mbili za viporo ligi kuu dhidi ya Dodoma Jiji na Azam Fc
Februari 04, Simba itasafiri mkoani Dodoma kuikabili Dodoma Jiji kisha kurejea jijini Dar es salaa kucheza na Azam Fc Februari 07
