Jioni ya leo Wanamsimbazi wataonja radha halisi ya michuano ya ligi ya mabingwa wakati mabingwa wa Tanzania Simba watakaposhuka uwanja wa Benjamin Mkapa kupepetana na mabingwa wa DR Congo TP Mazembe katika mchezo wa kuhitimisha michuano ya Simba Super Cup
Huu sio mchezo wa kukosa kwani kwa hakika utakuwa kipimo sahihi kwa Simba kulekea kampeni yao ya michuano ya ligi ya mabingwa hatua ya makundi
Simba wenyeji wa michuano hiyo wamepania kulibakisha kombe nyumbani, wakihitaji alama moja tu kutoka kwenye mchezo huo baada ya ushindi wa mabao 4-1 dhidi ya Al Hilal katika mchezo wa kwanza
TP Mazembe wao walikumbana na kipigo wasichokitarajia kutoka kwa Al Hilal kwa kufungwa mabao 2-1 hivyo ni wazi leo watataka kushinda
Mazembe watahitaji kushinda zaidi ya mabao matatu ili kuweza kuibuka mabingwa wa michuano hiyo ambayo bingwa ataondoka na kitita cha Tsh Milioni 15
Hii ni mechi muhimu sana kwa makocha wa timu zote kupima uimara wa vikosi vyao
Lakini kwa mashabiki huu ni mchezo wa kipekee kushuhudia burudani na ufundi kutoka kwa miamba hawa wa soka
Mchezo utapigwa kuanzia saa kumi kamili jioni mashabiki wakiaswa kujitokeza kwa wingi kuiunga mkono klabu yao ya Simba
Mwenyekiti wa Bodi ya Wakurugenzi Mohammed Dewji 'Mo' ameweka msisitizo kwa mashabiki kujitokeza kwa wingi ili pamoja na kushuhudia burudani, wachangie mapato ya klabu yao
