Jana winga Bernard Morrison aliwafunga midomo wakosoaji wake na wale wanaomdhihaki kwenye mitandao ya kijamii
Simba ikipata ushindi wa mabao 4-1 dhidi ya Al Hilal katika mchezo wa ufunguzi wa Simba Super Cup, Morrison alifunga mabao mawili na kusababisha bao moja lililowekwa kambani na Perfect Chikwende
Baada ya kufunga bao lake la kwanza, Morrison 'Mzee wa Kuwakera' akachukua mpira na kuuweka ndani ya 'bukta' yake kuonyesha ishara ya kuwa na 'busha'
Akizungumzia aina hiyo ya ushangiliaji, Morrison alisema kuwa amewasikia mashabiki wanaomkejeli kwenye mitandao ya kijamii kutokana na maradhi ya Hernia yaliyokuwa yakimsumbua
"Mimi sifahamu 'busha' ni nini, lakini naweza kukubali sawa ninalo. Sasa nilitaka kuwaonyesha wale wanaonikejeli kuwa hata kama nina busha lakini halinizuii kufanya mambo yangu uwanjani"
"Hernia ni ugonjwa kama ulivyo ugonjwa mwingine wowote, lakini wapo wanaochukulia jambo hili tofauti," alisema Morridon
Morrison alikuwa bora sana katika mchezo huo ambao alitumika kwa takribani dakika 30 tu
Mashabiki wa Simba walilipuka kwa furaha baada ya kumshuhudia uwanjani, ukiwa umepita muda mrefu tangu nyota huyo alipoonekana kwa mara ya mwisho dimbani
Wakati wa usajiliwa dirisha dogo kulikuwa na tetesi kuwa Morrison angeweza kuwa miongoni mwa wachezaji ambao wangeachwa lakini kwa hakika nyota huyu aliyetua kutoka klabu ya Yanga bado ni mchezaji muhimu sana
Atakuwa na mchango mkubwa katika michuano ya ligi ya mabingwa hatua ya makundi itakayoanza mwezi ujao
