Kiungo Mkenya Francis Kahata amesema yeye ni mchezaji halali wa klabu ya Simba mkataba wake ukimalizika mwishoni mwa msimu
Kumekuwa na taarifa ambazo bado hazijathibitishwa na uongozi wa Simba kuwa Kahata hatawatumikia mabingwa hao wa nchi kwenye ligi kwa kuwa jina lake limeondolewa kumpisha kiungo mpya raia wa Zimbabwe Perfect Chikwende
Uamuzi huo ulifikiwa baada ya Kahata kugomea kupelekwa kwa mkopo klabu ya Azam Fc
Kahata aliibuka kuwa mchezaji bora wa michuano ya kombe la Mapinduzi, mwenyewe amesema ataendelea kuitumikia Simba mpaka pale mkataba wake utakapomalizika
"Mambo mengi yanazungumzwa lakini nikwambie, mimi bado ni mchezaji wa Simba, nina mkataba hivyo nitaendelea kuwa hapa," alisema Kahata
Mkenya huyo alikuwa na wakati mgumu kupata namba kwenye kikosi cha kwanza wakati mabingwa hao wa nchi wakinolewa na Sven Vandenbroeck
Lakini aling'gara kule visiwani Zanzibar kwenye michuano ya kombe la Mapinduzi kikosi kikiwa chini ya Selemani Matola
Kahata aliibuka mchezaji bora wa mashindano na kuondoka na kitita cha Tsh Milioni nne
