Nyota mpya wa Simba Perfect Chikwende amesema ujio wake ndani ya mabingwa hao wa nchi utakuwa wa manufaa
Kiungo huyo mshambuliaji aliyesajiliwa kutoka klabu ya Fc Platinum ambayo hivi karibuni iliondoshwa na Simba katika hatua ya makundi michuano ya ligi ya mabingwa, amesema Simba ni klabu kubwa barani Afrika hivyo atahakikisha anapambana ili mchango wake uweze kuisaidia timu kutimiza malengo yake
Kuhusu ushindani wa namba, Chikwende amesema amejiunga na timu bora hivyo ushindani haliepukiki lakini muhimu kwake ni kuhakikisha anajituma kulishawishi benchi la ufundi aweze kuaminiwa
"Ni heshima kubwa kwangu kusajiliwa na Simba Sc, moja ya timu bora barani Afrika. Nimekuja hapa huku nikifahamu hii ni klabu kubwa naahidi kujituma kwa uwezo wangu wote ili kuisaidia timu kufikia malengo yake," alisema
Usajili wa Chikwende umewafurahisha wanachama na mashabiki wa Simba ambao wanaamini ujio wake utazidi kuimarisha safu ya ushambuliaji kuelekea michuano ya ligi ya mabingwa hatua ya makundi inayoanza wiki ijayo
Chikwende pia amesajiliwa kushiriki ligi ya ndani ikielezwa amechukua nafasi ya Francis Kahata ambaye atabakia kwenye kikosi cha ligi ya mabingwa mpaka mwishoni mwa msimu mkataba wake utakapomalizika
Inaelezwa Simba pia imemsajili mshambuliaji raia wa Nigeria Junior Lokosa kwa ajili ya michuano ya ligi ya mabingwa
Simba inaruhusiwa kuongeza nyota watano (nje ya wale 10) wa kigeni kwa ajili ya michuano ya ligi ya mabingwa
