Kaimu Kocha Mkuu wa Simba Selemani Matola amesema kikosi chake kiko kamili kuelekea mchezo wa fainali michuano ya kombe la Mapinduzi dhidi ya watani zao Yanga ambao utapigwa baadae leo Jumatano uwanja wa Amaan
Matola amesema pamoja na mchezo huu kuwa wa dabi ambao unazikutanisha timu zenye ushindani wa asili, hilo halitawazuia kutimiza azma yao ya kuwa mabingwa wa michuano hiyo
"Hii ni fainali na hii ni Dabi, mechi itakuwa ngumu lakini tumejipanga kuhakikisha tunashinda na kutwaa ubingwa wa Mapinduzi," amesema Matola
Matola alikabidhiwa mikoba ya kuinoa Simba baada ya aliyekuwa kocha mkuu Sven Vandenbroeck kutimkia Morocco kujiunga na FAR Rabbat
Michuano ya Mapinduzi ni ya kwanza kwake akiwa kocha mkuu, na amefanikiwa kushinda mechi zote tatu
Alianza kwa kuwabamiza Chipukizi Fc mabao 3-1, kisha akawachapa Mtibwa sugar mabao 2-0 kabla ya kutinga fainali kibabe kwa ushindi wa mabao 2-1 dhidi ya Namungo Fc
